"Միայն ես չեմ նվաճել այդ ամենը, ես այս թիմի մի մասնիկն եմ", - ասել է Գվարդիոլան, ով Բարսայի ղեկին նվաճեց իր 11 - րդ գավաթն ու միացավ Յոհան Կրույֆին` երկուսն էլ 11 - ական գավաթ են նվաճել Բարսան գլխավորելու ժամանակահատվածում: Գվարդիոլան այս այս ընթացքում 3 - ական անգամ թիմին դարձրել է Լա Լիգայի չեմպիոն և նվաճել Իսպանիայի սուպերգավաթը, 2 անգամ Բարսային հասցրել է ՉԼ - ի չեմպիոնության և 1 - ական անգամ թիմին հաղթանակ է բերել Իսպանիայի գավաթում, Եվրոպայի սուպերգավաթում ու Աշխարհի ակումբային առաջնությունում: Այդպիսով, Գվարդիոլան 14 հնարավոր տիտղոսներից 11 - ը նվաճել է, ինչը ֆանտաստիկ արդյունք է մարզչական կարիերան նոր սկսող մասնագետի համար: Նա այս ամենին հասել է 3 մրցաշրջանում և 4 - րդի մեկնարկային 2 խաղերում, փոխարենը Կրույֆը դա արել է մի ամբողջ 8 մրցաշրջանում: Նա այդ ընթացքում 4 անգամ թիմին դարձրել է Լա Լիգայի չեմպիոն, 3 անգամ` Իսպանիայի սուպերգավաթակիր և 1 - ական անգամ Եվրոպայի գավաթի հաղթող, Գավաթակիրների գավաթի հաղթող, Եվրոպայի սուպերգավաթակիր ու Իսպանիայի գավաթակիր:
Ֆուտբոլիստ Գվարդիոլան
Բացի 11 տիտղոսներից Բարսելոնայի ղեկին, պետք է նաև հիշել, որ Խոսեպ Գվարդիոլան եղել է Dream Team - ի ավագներից մեկը: Նա որպես ֆուտբոլիստ Բարսայի հետ 16 տիտղոս է նվաճել` Եվրոպայի գավաթ (1), Գավաթակիրների գավաթ (1), Եվրոպայի սուպերգավաթ (2), Լա Լիգայի չեմպիոն (6), Իսպանիայի գավաթ (2) և Իսպանիայի սուպերգավաթ (4):
Ավելացնենք, որ Գվարդիոլան իր թիմի հետ 3 - րդ անգամ անընդմեջ տիրացավ Իսպանիայի սուպերգավաթին, ինչը Ռեալի ռեկորդի կրկնությունն ու բացարձակ ռեկորդ է Բարսայի պատմության մեջ: Բացի այդ, պատմության մեջ առաջին անգամ Բարսան Իսպանիայի սուպերգավաթում հաղթեց Ռեալ Մադրիդին:
